అక్టోబ‌ర్ 30న "వనవాసి కళ్యాణ పరిషత్" ఆధ్వ‌ర్యంలో సామూహిక వివాహాలు - On October 30th Mass weddings under the auspices of "Vanavasi Kalyana Parishad"

“గిరిజనులకు వారి ప్రత్యేక సంస్కృతి, సంప్రదాయం, సామాజిక విలువలు ఉన్నాయి. గిరిజన సమాజంలో వివాహం అత్యంత ముఖ్యమైన పవిత్ర బంధం. పెళ్లంటే నూరేళ్ల పంట.. ఇద్దరితో కుటుంబ నిర్మాణం. కుటుంబాల సమూహం, సంఘం. మూడడుగులు, ఏడడుగులతో మొదలైన దాంపత్యం జీవితాంతం సాగుతుంది. ఈ హిందూ వివాహ వ్యవస్థ ప్రపంచంలోనే ప్రసిద్ధి చెందింది. ఈ సంప్రదాయాన్ని పాశ్చాత్యులు కూడా పాటిస్తున్నారు. అయితే, అద్భుతమైన వివాహ వేడుకలు ఖర్చుతో కూడుకున్నవి.” ఈ నేప‌థ్యంలో ఇటువంటి సామూహిక వివాహాల‌ను నిర్వ‌హిస్తున్న‌ట్టు పేర్కొన్నారు. “

“పురాతన తెగ చెంచులు నల్లమల అడవులలో నివసిస్తున్నారు. శ్రీశ్రీశ్రీ అహోబిల చెంచు లక్ష్మీ నరసింహస్వామి, శ్రీశ్రీశ్రీ శ్రీశైల మల్లికార్జునస్వామిని చెంచుల అల్లుళ్ళుగా పిలుస్తారు. చెంచులలో చాలామంది సంపదలో పేదవారు. పేదరికం కారణంగా వారికి పెళ్లిళ్లులేక పిల్లలు పుట్టడం చాలా కష్టం. జరిగే వివాహాలు కూడా కుల పెద్దల ఆశీస్సులకే పరిమితమవుతున్నాయి. ఆర్థిక సమస్యల కారణంగా చాలామంది చెంచులు పెళ్లి వేడుక జరుపుకోలేక పోతున్నారు.”

వనవాసి కళ్యాణ పరిషత్ కార్యక్రమాల్లో భాగంగా కష్టాల్లో ఉన్న చెంచులకు “సామూహిక వివాహాలు” నిర్వహించాలని నిర్ణయించారు. రెండు జిల్లాల్లోని ఆరు మండలాల్లోని 31 చెంచుగూడెంలలో సుమారు 140 జంటలను ఎంపిక చేశారు. ఈ కార్యక్రమం 30 అక్టోబర్, 2021 శనివారం నాడు శ్రీశైలం దారిలోని నాగర్ కర్నూల్ జిల్లాలోని అచ్చంపేటలో నిర్వహించనున్నారు. ఈ కార్యక్రమంలో ప్రముఖ ప్రవచనకర్త గరికపాటి నరసింహారావుగారి ఆశీః ప్రసంగం, ఇతర పెద్దలు కన్యాదాతలుగా, అతిథులుగా పాల్గొన‌నున్నారు. మారుమూల ప్రాంతంలో జరుగుతున్నటువంటి ఈ మహోన్నత కార్యక్రమాన్ని మీడియా ద్వారా తెలియజేసే అవకాశాన్ని కల్పించేందుకు ఈ రోజు (28 అక్టోబ‌ర్ ) “ప్రెస్ మీట్” ఏర్పాటు చేయ‌నున్న‌ట్టు  పేర్కొన్నారు. ఈ ప్రెస్ మీట్ లో జేష్ఠ ప్రచారకులు, వానవాసీ కళ్యాణాశ్రమ్ అఖిల భారత అధికారి శ్రీ కొరిగింజ రామచంద్రయ్యగారు, శ్రీ దేవేందర్ రావు తెలంగాణ కార్యదర్శి పాల్గొన‌నున్న‌ట్టు ప్ర‌క‌ట‌న‌లో పేర్కొన్నారు.